மத்திய அரசு ஊழியர்களுக்கான
7ஆவது ஊதியக் குழு
கால அவகாசம் நீட்டிப்பு 

புதுடில்லி, ஆக.28_ 7ஆவது ஊதியக் குழுவின் கால அவகாசத்தை, வரும் டிசம்பர் மாத இறுதி வரை நீட்டிப்பதற்கு மத்திய அமைச்சரவை புதன்கிழமை ஒப்புதல் அளித்தது.

இதுதொடர்பாக ஊதியக் குழுவின் செய்தித் தொடர்பாளர் தனது சுட்டுரையில் (டுவிட்டர்) புதன்கிழமை வெளியிட்ட பதிவில், "7ஆவது ஊதியக் குழுவின் கால அவகாசத்தை, வரும் டிசம்பர் மாதம் 31ஆம் தேதி வரை நீட்டிப்பதற்கு மத்திய அமைச் சரவை ஒப்புதல் அளித்துள்ளது' என்று தெரிவித் துள்ளார்.

மத்திய அரசு ஊழியர்களின் ஊதியங் களை 10 ஆண்டுகளுக்கு ஒரு முறை திருத்தியமைக்க வேண்டும் என்ற விதிமுறையின்படி, கடந்த ஆண்டு பிப்ரவரி மாதம், அப்போதைய அய்க்கிய முற்போக்குக் கூட்டணி அரசு 7ஆவது ஊதியக் குழுவை அமைத்தது.  குழுவின் அறிக்கையை, வரும் 31ஆம் தேதிக்குள் தாக்கல் செய்ய வேண்டும் என்று கால அவகாசம் நிர்ணயிக்கப் பட்டிருந்தது.

அடுத்த ஆண்டு ஜனவரி மாதம் 1ஆம் தேதி முதல் அமலுக்கு வரவுள்ள 7ஆவது ஊதியக் குழுவின் பரிந்துரைகளின் கீழ், 48 லட்சம் மத்திய அரசு ஊழியர்கள், ஓய்வூதியதாரர்கள் பயனடைய உள்ளது குறிப்பிடத்தக்கது.

-விடுதலை,28.8.15

---

மூட்டு எலும்புகள் பலம் பெற
10 நிமிட சூரிய ஒளி அவசியம் 

சென்னை, ஆக.28_ மூட்டு எலும்புகள் பலம் பெறுவதற்கு ஒரு நாளைக்கு பத்து நிமிட சூரிய ஒளி உடலில் படுவது அவசியம் என ராயப்பேட்டை மருத்துவமனையின் மூடநீக்கியல் நிபுணர் மருத்துவர் நசீர் அகமது தெரிவித்தார். எலும்பு மூட்டு தின விழிப்புணர்வு நிகழ்ச்சி சென்னை ராயப்பேட்டை மருத்துவமனையில் புதன்கிழமை நடைபெற்றது.

நிகழ்ச்சியில் மருத்துவர் நசீர் அகமது பேசியதாவது: எலும்பு வலுவிழத்தல் நோய், கீல்வாதம் உள்ளிட்ட பிரச்சினைகள் 35 வயதுக்கு மேற்பட்ட பெண்களையும், 45 வயதுக்கு மேற்பட்ட ஆண்களையும் தாக்குகிறது.

ஆண்களைவிட பெண்களையே இந்தப் பிரச்சினை அதிகம் பாதிக் கிறது. கால்சியம், வைட்டமின் டி3 குறைபாடுகளே இந்தப் பிரச்சினைக்கு முக்கிய காரணம்.  கால்சியம் சத்துக்களைப் பெறுவதற்கு கேழ்வரகை அதிக அளவில் உணவில் சேர்த்துக் கொள்ள வேண்டும்.

வைட்டமின் டி3 சத்துக்களைப் பெறுவதற்கு, காலை 10 மணி முதல் 4 மணி வரை ஒரு நாளைக்கு பத்து நிமிடம் சூரிய ஒளி உடலில் படுவது அவசியம் என்றார் அவர். எலும்பு மூட்டு தினத்தை முன்னிட்டு மருத்துவமனையில் 350 பேருக்கு எலும்பு அடர்த்தி பரிசோதனை செய்யப்பட்டது.