முதலாளிகள் ஆதிக்கம் உஷார்!

25.03.1934- புரட்சி - தலையங்கத்திலிருந்து...

இந்திய நாட்டின் தொழிலாள வகுப்பார்கள் தங்கள் அடிமைச் சங்கிலிகளை அறவே தகர்த்தெறிய, பரிபூரணமாக இன்னும் முற்படவில்லை என்றாலும், ஓர் அளவிற்கு அவர்கள் சமீப காலத்தில் விழிப்படைந்திருக்கிறார்கள் என்பது மாத்திரம் மறுக்க முடியாத உண்மையாகும்.

தொழிலாளர்களுடைய விழிப்பிற்குக் காரணம், அவர் களுடைய சகிக்க முடியாத கொடிய துன்பங்களும் கஷ்டங் களுமேயாகும்.

தொழிலாளர்களுக்கு, முதலாளிகளாலோ, அரசாங்கத் தாலோ இன்றைய தினம் கிருபா கடாட்சம் காட்டப் படுகின்றதென்று சொன்னால், அது அந்தத் தொழிலாளிகளின் உழைப்பின் பயனாகவே, நியாயமாக கிடைக்க வேண்டிய வரும்படியிலிருந்து கொஞ்சம் கொடுத்து,

தொழிலாளர்கள் வயிறு ஒட்டி, வாடி வதங்கிச் சாகாமலிருக்கச் செய்து, மீண்டும் சாவதமாக தங்களுக்கே ஊழியம் செய்து கொண்டிருப்பதற்கே தவிர, மற்றபடி நியாய புத்தியையோ, கருணைப் பிரவாகத் தையோ பச்சாதாப இரக்க புத்தியையோ, கொண்டதல்ல வென்று துணிந்து கூறுவோம்.

இன்றைய தினம் முதலாளியானவன், ஒரு தொழிலாளி யைப் பற்றி எப்பேர்க்கொத்த மனோநிலையைக் கொண்டி ருக்கிறான் என்று முடிவு கட்டுவதற்கு, அவனுடைய நடைமுறை வாழ்க்கையைப் பரிசீலனை செய்யுங்கள்.

ஒரு முதலாளிக்கு, அவனுடைய நாய்க்குட்டியோ, மைனாக் கிளியோ, எருமை மாடோ, செத்துப் போனால், அதை நஷ்ட மாகக் கருதி துக்கப்படுகிறான். ஆனால், ஒரு தொழிலாளி செத்துப் போனால், அந்தப்படி கூட துக்கப்படுவதைக் காணோம். தொழிலாளர்களுடைய இந்தப் பரிதாப நிலை மைக்கு யார் என்ன சமாதானம் கூறக் கூடும்?

தொழிலாளர்கள் தங்களுடைய நியாயமான உரிமையைப் பாதுகாத்துக்கொள்ள, இன்னும் தக்க சிரத்தை எடுத்துக் கொள்ளவில்லை என்றாலும், ஆங்காங்கே தொழிலாள சமுக விழிப்பின் காரணமாக, சில தொழிற் சங்க தாபனங்களும், டிரேட் யூனியன் சங்கங்களும் தாபிக்கப்பட்டு வந்திருக்கின்றன, வருகின்றன.

இவற்றில் சில முதலாளிமார்களின் சூழ்ச்சிக்கு அடங் கியதும், தொழிலாளர்களை வஞ்சித்து துரோகம் செய்வது மாகும். இதுபோன்ற தாபனங்கள் நாட்டில் புதிய அரசியல் சீர்திருத்தங்கள் வழங்க உத்தேசிக்கப்படும் காலம் முதல், ஒரு சில சுயநலப்பித்தர்களால் உண்டாக்கப்படுவது சர்வ சாதா ரணமாகும்.

இதைத்தக்கவாறு, தொழிலாளத் தோழர்கள் கவனித்து - பிறர் சூழ்ச்சிக்கு இடம் கொடுத்து விடக்கூடாது. (தொழி லாளர்களாகிய) தங்களின் ஆதிக்கத் தையே பரப்பப் பெரிதும் கண்ணும் கருத்துமாக இருக்க வேண்டுகிறோம்.

முதலாளி வகுப்பின் ஆதிக்கம் ஒழிந்தாலொழிய, தொழிலாளி விடுதலை பெற மார்க்கமில்லை என்பதை இன்றைய தினம் யாரும் ஆட்சேபணையின்றி ஒப்புக் கொள்வர்.

அதோடு ஜாதி அபிமானத்தாலோ மத அபிமானத்தாலோ தேசாபிமானத் தாலோ, கடவுளபிமானத்தாலோ, தொழிலாளர் களுடைய முற்போக்கு கிஞ்சிற்றும் ஏற்படுவதற்கு வழியில்லை என்பதும், சமீப காலத்தில் நாம் அனுபவ பூர்வமாகக் கூட கண்டறிந்த உண்மையாகும்.

உதாரணமாக இந்தத் தத்துவத்தை இரண்டு மாதங்களுக்கு முன்பு கூடிய அகில இந்திய டிரேட் யூனியன் காங்கிரசானது ஓர் அளவிற்கு நன்கு உணர்ந்து கொண்டது குறிப் பிடத்தக்கது. தொழிலாளர்களுடைய சரித்திரத்திலேயே மிகவும் சிலாகிக்கத் தக்க ஒரு விசேஷ சம்பவமும் இந்த மகாநாட்டில் நிறை வேறியது.

அதாவது மகாத்மா காந்தி உள்ளிட்ட மாபெரும் தேசியத் தலைவர்களெல்லாம் நாட்டின் முற்போக்கிற்கு தீங்கு விளைக் கும் தேசத் துரோகிகள் என்று பகிரங்கமாகவும், வன்மை யாகவும், ஆத்திரத் தோடும் எடுத்துக்காட்டப்பட்டுக் கண்டிக் கப்பட்டிருக்கிறார்கள்.

தொழிலாளர்களுடைய விழிப்பு நிலை. ஒருவாறு இவ்விதமாக இருப்பதால், தொழிலாள தோழர்களுக்கு ஒரே ஒரு விஷயத்தை மட்டும் குறிப்பிட்டு விட்டு இதனை முடித்துவிடுகின்றோம். அதாவது தொழிலாளியின் முன்னேற் றத்திற்குத் தொழிலாளி களையே நம்புங்களென்பதேயாகும்.

-விடுதலை,30.4.16

மே தினம் 29.04.1934- புரட்சி - தலையங்கத்திலிருந்து...

உலகில் உயிர் முளைத்த கால முதல், கஷ்டமும் தியாகமும் அவ்வுயிர்களுடன் கலந்தேயிருக்கின்றன. இது பிரபஞ்ச வாழ்க்கையிலொன்றாகும். கஷ்டமில்லாமல் தியாகமில்லாமல் ஒன்றும் கை கூடுவதாக இல்லை. உலகத்தின் மேல் நடப்பது, பெரும்பான்மை மக்களுக்கு முள் கம்பளத்தின் மேல் நடப்பதைபோல் ஒத்திருக்கின்றது.

முள் கம்பளத்தின் மேல் நடக்க யாருக்குத்தான் மனம் வரும்? ஆனால் அக்கம்பளத்தின் மேல் நடந்தால் தான், சுகப் பேற்றை அடைய முடிகிறது. இதைத்தான் தொழிலாளர் இயக்கத்துக்கு ஆசானாகிய காரல் மார்க்ஸ் என்பார், லோகாயுதத்தின் முரண் என்பார். கஷ்ட மில்லாமல் சுகமில்லை. சுகமும் கஷ்டமில்லாமல் கிடைப்ப தில்லை.

இதுதான் சமதர்மத் தத்துவத்தின் முரண்பாடு. பொது உடைமைக்காரர் யாராகிலும், இந்தப் பிரபஞ்ச முரண்பாட்டை அலட்சியம் செய்ய முடியாது. சோஷலிஸ்ட் அனைவரும், இந்தப் பிரபஞ்ச முரண்பாட்டை அடிப்படையாக வைத்து, தங்கள் தத்துவத்தைக் காட்டவேண்டும். சுதந்திரம் வேண்டு மானாலும், சகோதர தத்துவம் வேண்டுமானாலும், சரிசம சமத்துவம் வேண்டுமானாலும் தியாகத்தால் தான் அடைய முடியும்.

உடலுக்கு உணவு வேண்டுமானால், அறிவுக்குக் கல்வி வேண்டுமானால், தியாகம் அன்னியில் எதையுமடைய முடியாது! சுகம், துக்கம்; துக்கம், சுகம் வாழ்வில் பிணை கொண்டிருக்கும் படியால், தியாக மூர்த்திகள் செய்து வரும் தியாகம் உலக ஞாபகத்தில் இருந்து கொண்டேயிருக்கும். இவ்வித தியாக மூர்த்திகளின் ஞாபகத்தைக் கொண்டாடும் தினம் இந்த மே மாதம் முதல் தேதியாகும்.

இந்த மே தின ஞாபகம் ஏகாதிபத்திய ஆட்சிக்கல்ல, செல்வத்திற்கும் சம்பளத்திற்கு மல்ல, கொடுங்கோன்மைக்கு மல்ல, உலக மக்களனைவரும் உண்டு உடுக்கவும் இருந்து வாழவும், சந்ததி விருத்தி செய்யவும், அந்தச் சந்ததியார் உலக சுக பேற்றைப்பெறவும் செய்யும் தியாகமாகும்.

தற்போது உலகம் பலவித இடுக்கண்களால் கஷ்டப்பட்டு வருகின்றது. இல்லாமையும் வறுமையும், பஞ்சமும், வெள்ள மும் உலகை ஒருபுறம் வருத்திவரக் கொடுங்கோன்மைக் கட்சிகளாலும், முதலாளிகளின் அட்டூழியத்தாலும், வறுமை சுமையாலும் உலக நெருக்கடி அதிகரிக்கும் போலும்! உலகம் பிற்போக் கால் ரொம்பவும் கஷ்டப்பட வேண்டிவரும் போதும்! உலக நெருக்கடி குறைந்த பாடில்லை. சேனைத் தளங்கள் உலகில் அதிகரித்து வருகின்றன. மகாயுத்தத் தின் முன்னிருந்த சேனைத்தளங்களைவிட எண் மடங்கு அதி கரிக்கின்றன.

இத்தியாதி வியர்த்தங்களால் உலக மக்கள் இனிவரும் மாபெரும் யுத்தத்தில் மடியப் போகின்றனர். இனி வரும் யுத்தம் உலகில் விளைபொருள் போதாதென்பதற்கல்ல. செய்பொருள் செய்ய முடியவில்லை என்பதற்கல்ல.

வல்லரசு களின் ஆணவத்தாலும் அகம்பாவத்தாலும் விளையப் போகும் மகா பாதகமென அறிக!!! இம்மாபெரும் கேட்டைத் தடுப்பதற்கு உலகில் ஒருவரேயுளர். அவர்களால் தான், ரஷ்ய தேசம், புரட்சிக்குப் பின் நடந்த உள்நாட்டுக் கலகம், அடக்கப் பட்டது. வெளிநாடுகளின் உதவி பயன்படாமல் போயிற்று. போலண்ட் தேசத்து நெருக்கடியைச் சாக்காக வைத்துக் கொண்டு வல்லரசுகள் சோவியத் அரசை நசுக்கச் செய்த முயற்சி வீணானதாயிற்று. இவர்கள் யாரெனில் அகில இந்தியத் தொழிலாளர்களாவர்.

இவர்கள் தாம் உலக சமாதானத்தை நிலைக்க வைக்க வலிமை கொண்டவர். இவர்கள்தாம் அகில உலகப் போரை நிறுத்த வல்லவர். இவர்களுக்கு வேண்டிய தொன்றே. அதாவது, அகில உலகத் தோழர்கள் ஒற்றுமைப் பட்டு சுகத்திலும், துக்கத்திலும் ஒன்றுபட்டு வாழ வேண்டியதொன்றே. இந்த ஒற்று மைக்காக உலகத் தொழிலாளர் பல்லாண்டு தோறும்பட்ட கஷ்ட நிஷ்டூரங்களையெல்லாம் ஞாபகப் படுத்தும் தினம் மே மாதம் முதல் தேதியாகும்.

-விடுதலை,30.4.16

கலைஞர் மேதின வாழ்த்து

தொழிலாளர் சமுதாயம் எல்லா வளங்களையும், நலன்களையும் பெறவேண்டும் கலைஞர் மேதின வாழ்த்து

சென்னை, ஏப்.30- தொழிலாளர் சமுதாயம் எல்லா வளங் களையும், நலன்களையும் பெற்று வாழ்வாங்கு வாழ வேண்டு மென இந்த மேதின நன்னாளில் எனது நல்வாழ்த்துகளை உரித்தாக்குகிறேன் என தி.மு.க. தலைவர் கலைஞர் அவர்கள் விடுத்துள்ள மேதின வாழ்த்துச் செய்தியில் தெரிவித்துள்ளார்.

இதுகுறித்து அவர் இன்று (30.4.2016) விடுத்துள்ள வாழ்த்துச் செய்தியில் கூறியிருப்பதாவது:-

8 மணி நேர வேலை, முறையான ஊதியம் ஆகியவற்றை வலியுறுத்தி ரத்தம் சிந்திப் போராடி, உயிர்ப்பலி தந்து தொழிலாளர் சமுதாயம் பெற்ற உரிமை வரலாற்றை நினைவுபடுத்தும் இத் திருநாளில் தமிழக முன்னேற்றத்திற்காக நாளும் உழைத்திடும் தொழிலாளர் சமுதாய உடன்பிறப்புகளுக்கும், அவர்தம் குடும்பத்தார்க்கும் திராவிட முன்னேற்றக் கழகம் சார்பில் எனது உளமார்ந்த மே தின நல்வாழ்த்துகளைத் தெரிவித்து மகிழ்கிறேன்.

திராவிட முன்னேற்றக் கழகம் தொழிலாளர்களை உயிராக மதிக்கும் இயக்கம். தமிழகத்தில் ஆட்சிப் பொறுப்பேற்ற காலங்களில் எல்லாம் தொழிலாளர்களின் நலம் நாடிப் பல்வேறு திட்டங்களை உருவாக்கிச் செயல்படுத்தி வந்துள்ளது.

1969இல் முதலமைச்சராகப்  பொறுப்பேற்றவுடன் தொழி லாளர் நலனில் தனிக்கவனம் செலுத்த வேண்டும் என்பதற்காக, தொழில், தொழிலாளர் நலம், கூட்டுறவு என ஒன்றாக இருந்த மூன்று துறைகளிலிருந்து தொழிலாளர் நலனுக்கெனத் தனித் துறையையும், தனி அமைச்சகத்தையும் உருவாக்கியது;

1969ஆம் ஆண்டில் மே முதல் நாளை சம்பளத்தோடு கூடி பொது விடுமுறை

1969 ஆம் ஆண்டில் மே முதல் நாளை சம்பளத்தோடு கூடிய பொது விடுமுறை  நாளாக அறிவித்துச் சட்டம் இயற்றி நடைமுறைப்படுத்தியது;

1969இல் கணபதியாபிள்ளை பரிந்துரையை ஏற்று அவசரச் சட்டம் பிறப்பித்து விவசாயத் தொழிலாளர்களுக்கு நியாயமான கூலி வழங்க வகை செய்தது;

பீடித் தொழில், பனியன் நெசவு, தோல் பதனிடும் தொழில், எண்ணெய் ஆலைகள், செங்கற் சூளை, உப்பளம் முதலியவற்றில் வேலை செய்யும் தொழிலாளர்களுக்குத் தொழிற்சங்கப் பலம் இல்லாமையால் போதிய ஊதியம் வழங்கப்படாமல் அல்லல்பட்டு வந்த நிலைகண்டு அத்தொழிலாளர்களுக்குத் தொழில் முகவர் களிடம் பேசி, அவர்களுக்கெல்லாம் குறைந்தபட்ச ஊதியம் கிடைக்கச் செய்தது;

குடியிருக்கும் வீட்டுமனை சொந்தம்

1971இல் குடியிருப்பு அனுபோகதாரர்கள் சட்டம் கண்டு, 1,73,748 விவசாயத் தொழிலாளர்களுக்கு, அவர்கள் குடியிருக்கும் வீட்டுமனையை அவர்களுக்கே சொந்தமாக்கியது;

15 ஸ்டாண்டர்டு ஏக்கர் நில உச்சவரம்புச் சட்டம் கொண்டு வந்து; கிடைத்த உபரி நிலங்களை லட்சக்கணக்கான ஏழை விவசாயத் தொழிலாளர்களுக்கு வழங்கியது;
தொழிலாளர்கள் ஓய்வு பெறும்போது அரசு ஊழியர்களுக்கு உள்ளது போல் பணிக்கொடை வழங்கும் திட்டத்தைச் செயல் படுத்தியது; விபத்துகளால் பாதிக்கப்படும் தொழிலாளர்களின் குடும்பங்களைக் காப்பதற்காகத் தொழில்-விபத்து நிவாரண நிதித் திட்டத்தை உருவாக்கியது;

மதுரை பால்வளத் துறை ஊழியர்களுக்காகச் சென்னையில் அனுதாப வேலை நிறுத்தம் செய்ததால் அதிமுக அரசினால் வேலை நீக்கம் செய்யப்பட்ட தமிழ்நாடு பால்வள நிறுவனத்தின் 1095 ஊழியர்களை 1989இல் மீண்டும் பணியில் அமர்த்தியது;

1990இல் கையினால் செய்யப்படும் தீப்பெட்டி மீதான 8 சதவீத விற்பனை வரியை ரத்து செய்து இலட்சக்கணக்கான தொழிலாளர்கள் வேலை இழக்கும் அபாயத்தைத் தடுத்தது;

மேதினப் பூங்கா

மே தின நூற்றாண்டு விழாவினையொட்டி 1990இல் சென்னை நேப்பியர் பூங்கா விற்கு, மே தினப் பூங்கா எனப் பெயர் சூட்டி,  அங்கு மே தின நினைவுச் சின்னத்தை அமைத்தது; கட்டுமானத் தொழிலாளர் நலவாரியத்துடன் விவசாயத்  தொழி லாளர் நல வாரியம், மீனவர் நலவாரியம் உட்பட 2006-2011 ஆட்சிக் காலத்தில் 35 அமைப்பு சாரா தொழிலாளர் நல வாரியங்களை உருவாக்கி, கோடிக் கணக்கான ரூபாயை நலத்திட்ட உதவிகளாக வழங்கி, தொழி லாளர் சமுதா யத்தைக் காத்தது; காத்து வரு வது அனைத்தும் திராவிட முன்னேற்றக் கழகமே என் பதை இத்தருணத்தில் நினைவு படுத்துகிறேன்!

அமைப்பு சாராத் தொழிலாளர் நலன்

அதே வேளையில், 35 அமைப்புசாராத் தொழிலாளர் நலவாரியங்களையும் முடக்கிவிட்டு, தொழிலாளர் சமுதாயம் பெற்று வந்த பயன்கள் அனைத்தையும் தடுத்தது அதிமுக ஆட்சி. ஏழை எளியோருக்கு வழிகாட்டி துணைபுரிந்திட கழக ஆட்சிக் காலத்தில் நியமிக்கப்பட்ட 13 ஆயிரத்திற்கும் மேற்பட்ட மக்கள் நலப் பணியாளர்களை ஆட்சிக்கு வரும்போதெல்லாம் வேலை நீக்கம் செய்து, தற்போது நீதிமன்றங்களின் உத்தரவு களையும் மதிக்காமல் அவர்களின் குடும்பங்களைச் சித்ர வதைக்கு ஆளாக்கியுள்ளது அதிமுக ஆட்சி.

தொழிலாளர் விரோதப் போக்கு

நிர்வாகச் சீர்கேடுகளால் தொழில் வளர்ச்சியில் முதல் இடத்தில் இருந்த தமிழகத்தைக் கடைசி இடத்திற்குத் தள்ளிவிட்டு, ஆயிரக் கணக்கான தொழிற்சாலைகள் மூடப்படும் நிலையை ஏற்படுத்தி; பல்லாயிரக் கணக்கான தொழிலாளர்கள் வேலை இழந்து தவித்திடச் செய்து, தொழிலாளர் விரோதப் போக்கைத் தொடர்ந்து கடைப்பிடித்து வருவது அதிமுக ஆட்சியே என்பதைச் சுட்டிக்காட்டி;

தொழிலாளர் சமுதாயத்தின் தோழனாக, தொண்டனாக, காவல் அரணாக என்றும் விளங்குவது திராவிட முன்னேற்றக் கழகம்தான் என்பதை இத்தேர்தல் நேரத்தில் நினைவுபடுத்தி தொழிலாளர் சமுதாயம் எல்லா வளங்களையும், நலன்களையும் பெற்று வாழ்வாங்கு வாழவேண்டுமென இந்த மே தின நன் னாளில் எனது நல்வாழ்த்துகளை மீண்டும் உரித்தாக்குகிறேன்.

-விடுதலை,30.4.16

மே தின வாழ்த்து

உலகத் தொழிலாளிகள் ஒன்று சேர்ந்து உரிமைக் குரல் எழுப்பி வெற்றி பெற்ற நாளான மே நாள் - வரலாற்றுப் பெருமை வாய்ந்த தொழிலாளர் வெற்றி நாளாகும்!

"காண்பதெல்லாம் தொழிலாளி செய்தான்

அவன் காணத்தகுந்தது வறுமையோ?

அவன் பூணத் தகுந்தது பொறுமையோ?"

என்று புரட்சிக் கவிஞர் கேட்டதுபோல், இன்றும் வளம் கொழித்து, வறுமை போக்கிட ஒரு புது வாழ்வு வருகின்ற புது ஆட்சியான தி.மு.க.வால் கொண்டு வரப்படும் என்று நம்பி வாழ்த்துக்களைத் தெரிவிக்கிறோம்.

கி.வீரமணி
தலைவர்
திராவிடர் கழகம்

சென்னை
30.4.2016

தொழிலாளர் வைப்பு நிதி வட்டி மீண்டும் 8.8%

தொழிலாளர் வருங்கால வைப்பு நிதி வட்டி குறைப்பு: தொழிற்சங்கங்கள் எதிர்ப்பு

புதுடில்லி, ஏப்.27_ பி.எப். எனப்படும் தொழி லாளர் வருங்கால வைப்பு நிதிக்கான வட்டி விகிதம், கடந்த 2 நிதியாண்டுகளில் 8.75 சதவீதமாக நீடித்து வந்தது.

2015-_2016-ஆம் நிதி யாண்டில், வட்டி விகி தத்தை 8.8 சதவீதமாக உயர்த்த வேண்டும் என்று தொழிலாளர் வைப்பு நிதி அமைப்பின் முடிவு எடுக் கும் உயரிய அமைப்பான மத்திய அறங்காவலர்கள் வாரியம் கடந்த பிப்ரவரி மாதம் சிபாரிசு செய்தது. இந்த கூட்டம், மத்திய தொழிலாளர் நலத்துறை அமைச்சர் பண்டாரு தத் தாத்ரேயா தலைமையில் நடைபெற்றது.

ஆனால், மத்திய அறங் காவலர்கள் வாரியத்தின் சிபாரிசை நிராகரித்து விட்டு, வட்டி விகிதத்தை 8.7 சதவீதமாக மத்திய நிதி அமைச்சகம் குறைத்துள் ளது.

இத்தகவலை பண் டாரு தத்தாத்ரேயா, நாடா ளுமன்றத்தில் நேற்று முன்தினம் எழுத்துமூலம் அளித்த பதில் ஒன்றில் தெரிவித்தார்.

இந்த வட்டி குறைப் புக்கு முக்கிய தொழிற்சங் கங்கள் எதிர்ப்பு தெரிவித் துள்ளன. ஆர்.எஸ்.எஸ். ஆதரவு பாரதீய மஸ்தூர் சங்க் அமைப்பின் பொதுச் செயலாளர் விர்ஜேஷ் உபாத்யாயா, வட்டி குறைப் பைக் கண்டித்து ஏப்ரல் 27-ஆம் தேதி, தொழிலாளர் வைப்பு நிதி அலுவலகங்கள் முன்பு ஆர்ப்பாட்டம் நடத்தப்படும் என்று அறி வித்துள்ளார்.

காங்கிரஸ் தொழிற்சங்க மான அய்.என்.டி.யூ.சி.யின் தலைவர் அசோக் சிங், தொழிலாளர்களின் பணத் தை நிர்வகிக்கும் அமைப் பில் குறுக்கிட மத்திய நிதி அமைச்சருக்கு என்ன அதி காரம் உள்ளது? என்று கேள்வி விடுத்தார்.-

-விடுதலை,27.4.16

மத்திய அரசு அறிவிப்பு ஒப்பந்த ஊழியர்களின் குறைந்தபட்ச ஊதியம் ரூ10,000

மத்திய அரசு அறிவிப்பு
ஒப்பந்த ஊழியர்களின் குறைந்தபட்ச ஊதியம் ரூ10,000

புதுடில்லி, ஏப்.26_ ஒப்பந்தத் தொழிலாளர்களின் குறைந்தபட்ச மாத ஊதியம் ரூ.10,000 ஆக உயர்த்தப் பட்டுள்ளது என்று மத்திய தொழிலாளர் நலன் மற்றும் வேலைவாய்ப்புத் துறை இணை அமைச்சர் பண்டாரு தத்தாத்ரேயா மக்களவையில் நேற்று (25.4.2016) தெரிவித்தார்.

கேள்வி நேரத்தின்போது, இது தொடர்பாக அவர் கூறுகையில், உச்சநீதிமன்ற தீர்ப்பின்படியும், தேசிய அளவிலான ஆலோசனையின் அடிப்படையிலும், ஒப்பந்த தொழிலாளர்களின் குறைந்தபட்ச மாத ஊதியம் ரூ.10,000 ஆக சமீபத்தில் அதிகரிக்கப்பட்டுள்ளது என்றார்..

viduthalai (26.04.2016)

அரசு ஊழியர்கள்-ஆசிரியர்களுக்கு 6 சதவீதம் அகவிலைப்படி உயர்வு தமிழக அரசு உத்தரவு

சென்னை,  ஏப்.21_ அரசு ஊழி யர்கள் -ஆசிரியர்களுக்கு 6 சதவீத அக விலைப்படியை தமிழக அரசு உயர்த்தி வழங்கியுள்ளது.

தேர்தல் நடத்தை விதிகள் நடைமுறையில் உள்ளதால், தேர்தல் ஆணையத்தின் அனுமதியைப் பெற்று இதற்கான உத்தரவை தமிழக அரசு பிறப்பித்துள்ளது. மத்திய அரசு ஊழியர்களுக்கு அகவிலைப்படி உயர்த்தி வழங்கும் போது, மாநில அரசு ஊழியர்களுக்கும் அதே அளவில் உயர்த்தி வழங்கப்படுவது வழக்கம்.

கடந்த மார்ச் மாதம் மத்திய அரசு ஊழியர்களுக்கு அகவிலைப்படி 6 சதவீதம் உயர்த்தப்பட்டது. இதனால், அகவிலைப்படியின் அளவு 119 சதவீதத்தில் இருந்து 125 சதவீதமாக அதிகரித்தது.

இந்த உத்தரவு விவரம்: தமிழக அரசு ஊழியர்கள், ஓய்வூதியதாரர்கள், குடும்ப ஓய்வூதியதாரர்களுக்கு 6 சதவீதம் அகவிலைப்படி உயர்வு அளிக் கப்படுகிறது.  இந்த அகவிலைப்படி உயர்வு கடந்த ஜனவரி 1 ஆம் தேதி முதல் முன்தேதியிட்டு வழங்கப்படும்.  இந்த உயர்வால் சுமார் 18 லட்சம் அரசு அலுவலர்கள், ஓய்வூதியம் மற்றும் குடும்ப ஓய்வூதியம் பெறுபவர்கள் பயனடைவர் என்று சண்முகம் தெரிவித்துள்ளார்.

-விடுதலை,21.4.16

ஒப்பந்தத் தொழிலாளர்களுக்கு ரூ10,000 குறைந்தபட்ச ஊதியம் மத்திய அரசு நடவடிக்கை

அய்தராபாத், ஏப்.18_  ஒப்பந்தத் தொழிலாளர்களுக்கு குறைந்தபட்சம் ரூ.10,000 ஊதியம் அளிக்கும் வகையில் மத்திய அரசு விரைவில் நிர்வாக உத்த ரவைப் பிறப்பிக்கும் என்று மத்திய தொழிளாளர், வேலைவாய்ப்புத் துறை அமைச்சர் பண்டாரு தத்தாத்ரேயா கூறியுள்ளார். அய்தராபாதில் ஞாயிற் றுக்கிழமை செய்தியாளர்களிடம் இது தொடர்பாக அவர் மேலும் கூறிய தாவது: தொழிலாளர் சட்டத்தில் பல்வேறு திருத்தங்களைக் கொண்டு வர மத்திய அரசு நடவடிக்கை எடுத்துள்ளது. முக்கியமாக குறைந்தபட்ச ஊதியத்தை அனைவருக்கும் சமமாக்க முடிவு செய் யப்பட்டுள்ளது. இதன்படி ஒப்பந்தத் தொழிலாளர்களுக்கு குறைந்தபட்சம் ரூ.10,000 ஊதியம் அளிக்க விரைவில் நிர்வாக உத்தரவை மத்திய அரசு பிறப் பிக்க இருக்கிறது.

இந்தக் குறைந்தபட்ச ஊதியத்தை நாடாளு மன்றத்தில் சட்டமாக நிறைவேற்ற எதிர்க்கட்சிகள் ஒத்து ழைப்பு அளிக்காது. எனவே, தொழி லாளர்களின் நலனைக் கருத்தில் கொண்டு அதனை நிர்வாக உத்தரவாக நடைமுறைப்படுத்த அரசு முடி வெடுத்துள்ளது.

இது தொடர்பான விதிகளை வகுத்து, ஒப்புதலுக்காக சட்ட அமைச் சகத்துக்கு அனுப்பியுள்ளோம். விரை வில் இது தொடர்பான அறிவிக்கை வெளியாகும். அதைத் தொடர்ந்து மாநில அரசுகள் புதிய முடிவை அமல் படுத்தும்.

மொத்தவிலைக் குறியீட்டு எண், அகவிலைப் படி ஆகியவற்றைக் கவனத்தில் கொண்டு குறைந்தபட்ச ஊதியத்தை நிர்ணயிக்க வேண்டும் என்று உச்ச நீதிமன்றம் கூறியிருந்தது.

-விடுதலை,18.4.16

தொழிலாளர் வருங்கால வைப்பு நிதி புதிய விதிகளுக்கு எதிர்ப்பு போராட்டத்திற்கு பணிந்தது மத்திய அரசு

புதுடில்லி, ஏப்.20_ தொழிலாளர்கள் தரப்பில் இருந்து கடும் எதிர்ப்பு எழுந்ததையடுத்து, தொழிலாளர் வருங்கால வைப்பு நிதியை (பிஎஃப்) திரும்பப் பெறுவதற்கு விதிக்கப்பட்ட புதிய கட்டுப்பாடுகளை மத்திய அரசு செவ்வாய்க்கிழமை ரத்து செய்தது.

முன்னதாக, பிஎஃப் புதிய விதிகளுக்கு எதிர்ப்புத் தெரிவித்து பெங்களூரில் தொழிலாளர்கள் நடத்திய போராட்டத்தில் வன்முறை வெடித்தது. இதில் அரசுப் பேருந்துகள் உள்பட 25 வாகனங்களுக்குத் தீ வைக்கப்பட்டது.

புதிய கட்டுப்பாடுகள்: தொழிலாளி ஒருவர் தொடர்ந்து 2 மாதகாலம் தொடர்ந்து பணியில் இல்லையெனில் தனது பிஎஃப் பணத்தைத் திரும்பப் பெற விண்ணப்பிக்க முடியும் என்ற நிலை இருந்து வந்தது. மேலும் பணியில் இருப்பவர்கள் 54 வயதை எட்டினால் பிஎஃப் பணத்தைப் பெற முடியும் என்ற விதியும் இருந்தது. இதனை மாற்றும் வகையில் கடந்த பிப்ரவரி 10-ஆம் தேதி மத்திய அரசு ஓர் அறிவிக்கை வெளியிட்டது. அதில், ஒரு தொழிலாளி பணியில் இருந்து விடுபட்டு விட்டாலும், பிஎஃப் பணத்தை 58 வயதுக்கு முன்னர் திரும்ப எடுக்க முடியாது. தொடர்ந்து பணியில் இருப்பவர்கள் கூட 57 வயதுக்குப் பிறகுதான் பிஎஃப் பணத்தைத் திரும்பப் பெற விண்ணப்பிக்க முடியும் என்று விதிகள் மாற்றப்பட்டன. இந்தப் புதிய விதிகள் ஏப்ரல் 1-ஆம் தேதி முதல் நடைமுறைக்கு வரும் என்று அறிவிக்கப்பட்டது.

தொழிற்சங்கங்கள் எதிர்ப்பு: மத்திய அரசின் இந்த முடிவுக்கு பல்வேறு தொழிற்சங்கங்களும் கடும் எதிர்ப்புத் தெரிவித்தன. தொழிலாளர்கள் தங்கள் சொந்த உழைப்பில் ஈட்டும் பணத்தைத் திரும்பப் பெற அரசு கடுமையான கட்டுப்பாடுகளை விதிப்பதை ஏற்க முடியாது என்று தொழிற்சங்கத்தினர் கூறினர்.

இந்த எதிர்ப்பை அடுத்து, புதிய விதிகள் அமலாக்கத்தை மே 1-ஆம் தேதிக்கு ஒத்திவைப்பதாக மத்திய அரசு அறிவித்தது. எனினும், புதிய விதிகளை முற்றிலுமாக ரத்து செய்ய வேண்டுமென்று நாட்டின் பல்வேறு பகுதிகளில் தொழிலாளர்கள் போராட் டத்தில் இறங்கினர்.

பெங்களூரில் வன்முறை: இந்நிலை யில், பிஎஃப் புதிய விதிகளைக் கண்டித்து பெங்களூரில் செவ்வாய்க்கிழமை 2-ஆவது நாளாக நடைபெற்ற போராட் டத்தில் வன்முறை வெடித்தது. இதில் அரசுப் பேருந்துகள் உள்பட 25-க்கும் மேற்பட்ட வாகனங்களுக்குத் தீவைக்கப் பட்டது.

பெங்களூரு பொம்மனஹள்ளியில் திங்கள்கிழமை 5 தனியார் ஆயத்த ஆடை நிறுவனங்களைச் சேர்ந்த சுமார் 10 ஆயிரம் தொழிலாளர்கள் சாலை மறியல் போராட்டத்தில் ஈடுபட்டனர். தொடர்ந்து 2-ஆவது நாளாக செவ்வாய்க்கிழமையும் மத்திய அரசைக் கண்டித்து தொழிலாளர்கள் போராட்டத்தில் ஈடுபட்டனர். தும்கூரு சாலையில் போராட்டத்தில் ஈடுபட்டவர்கள் சாலையில் சென்ற அரசுப் பேருந்துகளை நிறுத்தி, அதில் இருந்த பயணிகளை இறக்கிவிட்டு, பேருந்துகளுக்குத் தீ வைத்தனர். இதில் 6 அரசுப் பேருந்துகளும் ஒரு மாநகரப் பேருந்தும் தீக்கிரையாயின. அதேபோல், ஒசூர் சாலையில் உள்ள ஹெப்பகோடியில் போராட்டத்தில் ஈடுபட்ட தொழிலாளர்கள், அங்குள்ள காவல் நிலையத்தில் பறிமுதல் செய்யப்பட்டு நிறுத்தி வைத்திருந்த வாகனங்களுக்குத் தீ வைத்தனர். இதில் 20-க்கும் மேற்பட்ட வாகனங்கள் தீக்கிரையாயின.

துப்பாக்கிச்சூட்டில் மாணவி காயம்: ஹெப்பகோடியில் வன்முறையைக் கட்டுப்படுத்த காவலர்கள் துப்பாக்கி யால் சுட்டனர். அப்போது கல்லூரி மாணவி பிரீத்தி (18) என்பவரின் தொடையில் குண்டு பாய்ந்தது. இதனையடுத்து, அவர் சிகிச்சைக்காக தனியார் மருத்துவமனையில் அனுமதிக் கப்பட்டார்.

பணிந்தது மத்திய அரசு: பெங்களூர் வன்முறைச் சம்பவத்தை அடுத்து டில்லியில் செய்தியாளர்களிடம் மத்திய தொழிலாளர் நலத் துறை அமைச்சர் பண்டாரு தத்தாத்ரேயா கூறியதாவது:
பிஎஃப் விதிமுறைகள் திருத்தம் தொடர்பாக மத்திய அரசு கடந்த பிப்ரவரி 10-ஆம் தேதி வெளியிட்ட அறிவிப்பு ரத்து செய்யப்படுகிறது. பிஎஃப் பணத்தை திரும்ப எடுப்பதில் ஏற்கெனவே இருந்த நடை முறைகளே தொடரும். தொழிற்சங்கங்களின் வேண்டுகோளுக்கு இணங்க இந்த முடிவு எடுக்கப்பட்டுள்ளது என்றார்.

.-விடுதலை,20.4.16