சென்னை மாநகராட்சி தூய்மைப் பணியாளர்களுக்கு உணவுக்குப் பதிலாக நாள் ஒன்றுக்கு ரூ.50 உணவுப்படி! தமிழ்நாடு அரசு அரசாணை வெளியீடு!

 சென்னை, செப். 28- சென்னை மாநகராட்சியில் பணிபுரியும் தூய்மைப் பணியாளர்களுக்கு வழங்கப்பட்டு வந்த இலவச உணவுத் திட்டம் ரத்து செய்யப்பட்டு, அதற்குப் பதிலாக நாள்தோறும் ரூ.50 உணவுப்படியாக வழங்கத் தமிழ்நாடு அரசு அரசாணை வெளியிட்டுள்ளது.

சென்னை மாநகராட்சியில் பணிபுரியும் 24,264 தூய்மைப் பணியாளர்களுக்கு இந்த உணவுப்படியை வழங்குவதற்காகத் தமிழ்நாடு அரசு சார்பில் ரூ.44 கோடி நிதி ஒதுக்கீடு செய்யப்பட்டுள்ளது.

பணியாளர்களின் கோரிக்கை

இலவச உணவாக வழங்குவதை விட, அதற்கான தொகையை உணவுப்படியாக வழங்க வேண்டும் என்று 92 சதவீதத் தூய்மைப் பணியாளர்கள் கோரிக்கை விடுத்ததன் அடிப்படையிலேயே இம்மாற்றம் செய்யப் பட்டுள்ளதாக அரசாணையில் தெரிவிக் கப்பட்டுள்ளது.

இனித் தூய்மைப் பணியாளர்கள் நாள் ஒன்றுக்கு ரூ.50 வீதம் தங்களது விருப்பத்திற்கேற்ப உணவைப் பெற்றுக் கொள்ளவோ அல்லது உணவுப்படியாகப் பெற்றுக்கொள்ளவோ வழிவகை செய்யப்பட்டுள்ளது.

அரசின் இந்த நடவடிக்கை தூய்மைப் பணியாளர் களின் நீண்ட நாள் கோரிக்கையை நிறைவேற்றும் வகையிலும், அவர்களுக்குப் பயனுள்ள வகையிலும் அமைந்துள்ளதாகத் தெரிவிக்கப்பட்டுள்ளது.

- விடுதலை நாளேடு, 28.9.26

பிஎஃப் திட்டத்தில் கட்டாயம் சேர்வதற்கான மாத ஊதிய வரம்பு ரூ.25,000 ஆக உயர்வு!

 புதுடில்லி, செப். 17- பிஎப் பிடித்தத்தின் கீழ் கட்டாய வரம் பில் வருவதற்கான மாத ஊதிய வரம்பை ரூ.15 ஆயிரத்தில் இருந்து ரூ.25 ஆயிரமாக உயர்த்த ஒன்றிய அமைச்சரவை ஒப்புதல் அளித்துள்ளது.

தொழிலாளர் வருங்கால வைப்பு நிதி அமைப்பின் (இபிஎப்ஓ) ஊதிய வரம்பு கடந்த 2010 முதல் 2014 வரை மாற்றமின்றி இருந்தது. செப்டம்பர் 2014இல் அது ரூ.15,000 ஆக உயர்த்தப்பட்டது. முதல் முறையாக வேலைக்கு சேர்பவரின் அடிப்படை ஊதியம் ரூ.15 ஆயிரத்திற்கு கீழ் இருந்தால் கட்டாயம் பிஎப் திட்டத்தில் சேர வேண்டும். ரூ.15 ஆயிரத்திற்கு அதிகமாக இருந்தால் சம்பந்தப்பட்ட ஊழியரின் விருப்பப்படி பிஎப் திட்டத்தில் சேராமலும் இருக்கலாம்.
இந்நிலையில், 12 ஆண்டுகளுக் குப் பிறகு தற்போது மீண்டும் பிஎப் ஊதிய வரம்பு உயர்த்தப் பட்டுள்ளது. இது ரூ.15 ஆயிரத்தில் இருந்து ரூ.25 ஆயிரமாக உயர்த்த ஒன்றிய அமைச்சரவை ஒப்புதல் அளித்தள்ளதாகவும், இதன் மூலம் 51 லட்சத்திற்கு மேற்பட்ட கூடுதல் ஊழியர்கள் கட்டாய பிஎப் வரம்புக்குள் கொண்டு வரப்படுவார்கள் என்றும் ஒன்றிய தகவல் மற்றும் ஒலிபரப்புத்துறை அமைச்சர் அஸ்வினி வைஷ்ணவ் கூறி உள்ளார்.
இந்த திருத்தப்பட்ட வரம்பு (17.9.2026) இன்று முதல் அமலுக்கு வருவதாக ஒன்றிய தொழிலாளர் மற்றும் வேலைவாய்ப்பு அமைச் சகம் அறிவித்துள்ளது. ஒன்றிய தொழிலாளர் மற்றும் வேலை வாய்ப்பு துறை அமைச்சர் மன்சுக் மாண்டவியா எக்ஸ் பதி வில், ‘‘அமைச்சரவையின் முடிவு நாட்டின் தொழிலாளர்களுக்கு பரந்த சமூக பாதுகாப்பை வழங்கு வதோடு, வேலைவாய்ப்பை முறை சார்ந்ததாக மாற்றுவதையும் துரிதப் படுத்தும்’’ என கூறி உள்ளார்.
இந்த நடவடிக்கையால் இனி ரூ.25,000 வரை ஊதியம் வாங்கும் ஊழியர்களுக்கும் பிஎப், ஓய்வூதியம் மற்றும் காப்பீட்டு பலன்கள் கட்டாயமாக கிடைக்கும். ஊழியர்களின் ஓய்வூதியத் திட்டத்திற்கு கணக்கிடப்படும் உச்சவரம்பும் ரூ.25,000 ஆக உயர்வதால், மாதாந்திர ஓய்வூதியத் தொகை சுமார் 66.7% வரை அதிகரிக்கும். இந்த முடிவால் அரசுக்கு ஆண்டிற்குச் சுமார் ரூ.11,339 கோடி செலவாகும் என எதிர்பார்க்கப்படுகிறது. தற்போது அளிக்கப்படும் நிதியுதவி ரூ.10,250 கோடி. அடுத்த 5 ஆண்டுகளில் இதற்கான மொத்தச் செலவு சுமார் ரூ.56,696 கோடி என மதிப்பிடப் பட்டுள்ளது.

-விடுதலை நாளேடு, 17.09.26

இந்தியன் ஓவர்சீஸ் வங்கி பிற்படுத்தப்பட்ட ஊழியர் நலச் சங்கத்தின் மாநில மாநாடு சென்னையில் நடந்தது

 

சென்னை, செப்.10 அனைத்திந்திய இந்தியன் ஓவர்சீஸ் வங்கியின் இதர பிற் படுத்தப்பட்ட ஊழியர் நலச் சங்கத்தின் 19ஆம் ஆண்டு விழா 6.9.2026 அன்று சென்னையில் நடைபெற்றது.

விழா தொடக்கத்தில் ஒடுக்கப்பட்ட மக்களின் மேம்பாட்டிற்காக – சமூகநீதி கிடைப்பதற்கு அரசியலமைப்புச் சட்டத்தில் உரிய பிரிவுகளை உருவாக்கிட – மக்கள் திரள் போராட்டத்தின் மூலம் வழிமுறை கண்ட தந்தை பெரியாரின் ஒளிப்படத்தினை திறந்து அனைவரும் மரியாதை செலுத்தினர்.

ஊழியர் நல சங்கத்தின் ஆண்டு விழாவினை யொட்டி பெண்களின் மேம்பாடு மற்றும் சமூகநீதி – இடஒதுக்கீடு குறித்த கருத் தரங்கம் நடைபெற்றது. சங்கத்தின் பொதுச் செயலாளர் ஏ. இராஜசேகர் கருத்தரங்கு நடவடிக்கைகளை ஒருங்கிணைத்து தலைமை வகித்தார். சங்கத்தின் செயல் தலைவர் ரவீனா விஜயகுமார் வருகை தந்தோரை வரவேற்றுப் பேசினார்.

திராவிட இயக்க தமிழர் பேரவையின் பொதுச் செயலாளர் பேராசிரியர் சுப. வீரபாண்டியன், நாடாளுமன்ற மேனாள் உறுப்பினர் டி.கே.எஸ். இளங்கோவன் சிறப்பு விருந்தினர்களாகப் பங்கேற்று சமூகநீதி – இடஒதுக்கீடு நடைமுறைபற்றி சிறப்புரை ஆற்றினர். ஜாதிவாரி மக்கள் தொகை கணக்கெடுப்பின் அவசியத்தையும் கணக்கெடுப்பு நடத்தப்படும் விதம் குறித்தும் விளக்கமாக எடுத்துரைத்தனர். பிற்படுத்தப் பட்டோர் பற்றிய கணக்கெடுப்பு ஜாதி என்ற குறிப்பில் ஏற்கெனவே உள்ள ஒன்றிய, மாநில அரசுப் பட்டியல்களில் உள்ள பெயரிலேயே பதிவிடப்பட்ட வேண்டும் என்பதுடன் சமூக நீதியின் ஆக்கத்திற்கு உதவிடும் வகையில் இருக்கும் என விரிவாகப் பேசினர்.

சமூக செயல்பாட்டாளரும் வழக் குரைஞருமான பவதாரணி, சமூகத்தில் பெண்கள் சந்திக்கும் சவால்கள் குறித்து சிறப்புரையினை வழங்கினார்.

அனைத்திந்திய பிற்படுத்தப்பட்ட ஊழியர் நல சங்கங்களின் கூட்ட மைப்பின் பொதுச் செயலாளர் கோ. கருணாநிதி பிற்படுத்தப்பட்ட ஊழியர் நலத் திட்டங்கள் குறித்தும், அவைகளை முழுமையாக நடை முறைப்படுத்தி பயன் பெறும் வழிமுறைகள் குறித்தும் விரிவாகப் பேசினர். ஊழியர் நலச் சங்கத்தின் ஆண்டு விழாவிற்கு வாழ்த்து தெரிவித்தும், வருங்காலத்தில் சங்கத்தின் செயல்பாடுகள் பரவலாகத் தெரிகின்ற வகையில் உறுப்பினர் சேர்க்கையில் அக் கறை காட்டி  நடை பெற வேண்டும் எனக் குறிப்பிட்டுப் பேசினார்.

விழாவின் நிறைவாக நலச் சங்கத் தின் பொருளாளர் பி.டி. ஆனந்த் நன்றி கூறினார்.

இந்தியன் ஓவர்சீஸ் வங்கி பிற்படுத் தப்பட்ட ஊழியர் நலச் சங்கத்தின் புதிய தலைவராக சேதுராமன் தேர்ந் தெடுக்கப்பட்டார்.

ஆண்டு விழாவில் பல மாநிலப் பிரதிநிதி உறுப்பினர்கள், பிற நிறுவன பிற்படுத்தப்பட்ட ஊழியர் நலச் சங்கத்தின் பொறுப்பாளர்கள் மற்றும் சமூகநீதியில் நாட்டம் கொண்ட பிரமுகர்கள் பலரும் பங்கேற்றுச் சிறப் பித்தனர்.

-- விடுதலை நாளேடு, 10.09.2026

-------------------------------------------------------------------------------------------------------------

தென் சென்னை திராவிடர் கழக ஊடகம்

கலந்துகொண்ட திராவிடர் கழக தோழர்கள்

கொடுங்கையூர் தங்கமணி, த.தனலட்சுமி, தென் சென்னை செயலாளர் செ.ர.பார்த்தசாரதி, அரும்பாக்கம் சா.தாமோதரன், த.ராஜா, பெரியார் மாணாக்கன்,, ஆவடி துணைச்செயலாளர் க.தமிழ்ச்செல்வன், தாம்பரம் சு.மோகன்ராஜ் மற்றும் பலர் கலந்துகொண்டனர்.

அரசு ஊழியர்களின் 3ஆவது குழந்தைக்கும் 365 நாள் மகப்பேறு விடுப்பு! அரசாணை வெளியீடு

 சென்னை, செப். 4- தமிழ்நாடு அரசில் பணிபுரியும் பெண் ஊழியர்களின் 3ஆவது குழந்தைக்கான மகப்பேறு விடுப்பு 12 வாரங்களில் இருந்து 365 நாட்களாக உயர்த்தி அரசாணை வெளியிடப்பட்டுள்ளது.

இது தொடர்பாக தமிழ்நாடு அரசு வெளியிட்டுள்ள அரசாணை: தமிழ்நாடு அரசில் பணியாற்றும் திருமணமான பெண் ஊழியர்களுக்கு, 2 குழந்தைகளுக்கு குறைவாக இருக்கும் நிலையில், முழு ஊதியத்துடன் 365 நாட்கள் மகப்பேறு விடுப்பு ஏற்கெனவே வழங்கப்பட்டு வருகிறது. அதேபோல், 2 அல்லது அதற்கு மேற்பட்ட குழந்தைகள் உள்ள பெண் அரசு ஊழியர்களுக்கு 12 வாரங்கள் மகப்பேறு விடுப்பு வழங்கப்பட்டு வந்தது.

இந்நிலையில், 2026-2027ஆம் ஆண்டுக்கான மனிதவள மேலாண்மை துறை மானியக் கோரிக்கையின்போது, கடந்த ஆகஸ்ட் 18ஆம் தேதி சட்டப்பேரவையில் அமைச்சர் வெளியிட்ட அறிவிப்பில், தமிழ்நாடு அரசில் பணிபுரியும் பெண் ஊழியர்களின் 3ஆவது குழந்தைக்கான மகப்பேறு விடுப்பு 12 வாரங்களில் இருந்து 365 நாட்களாக உயர்த்தப்படும் என்று தெரிவிக்கப்பட்டது. அதன்படி, 3ஆவது குழந்தைக்கான 12 வார மகப்பேறு விடுப்பு 365 நாட்களாக உயர்த்தப்பட்டுள்ளது. நிரந்தர மற்றும் தற்காலிகப் பணியில் உள்ள திருமணமான பெண் அரசு ஊழியர்கள் இந்தச் சலுகையை பெறலாம். இந்த 365 நாட்களுக்கும் முழு ஊதியம் வழங்கப்படும்.

மேலும், மகப்பேறு விடுப்பை மகப்பேறுக்கு முந்தைய ஓய்வு காலம் முதல் மகப்பேறுக்குப் பிந்தைய உடல்நல மீட்பு காலம் வரை, சம்பந்தப்பட்ட பெண் ஊழியரின் விருப்பத்துக்கு ஏற்ப பயன்படுத்திக் கொள்ளலாம். உத்தரவு பிறப்பிக்கப்பட்ட தேதிக்கு முன்பே 3ஆவது குழந்தைக்காக மகப்பேறு விடுப்பில் சென்று, அந்த விடுப்பை தொடர்ந்து அனுபவித்து வரும் பெண் அரசு ஊழியர்களுக்கும் இந்த புதிய சலுகை பொருந்தும். அவர்கள் மொத்தமாக 365 நாட்கள் வரை மகப்பேறு விடுப்பு எடுத்துக் கொள்ளலாம். இவ்வாறு அதில் குறிப்பிடப்பட்டுள்ளது.

- விடுதலை நாளேடு, 4.9.26